Kanabisi Hapësinor Mund të Jetë E Ardhmja, Thotë Ish-Astronauti

Duke folur për Futurism, Chris Hadfield, një astronaut kanadez në pension, diskutoi mundësitë e përdorimit të substancave dehëse në hapësirë dhe krijimin e fabrikave prodhuese në orbitë me gravitet zero, të cilat do të prodhonin në masë kanabinoidë të cilësisë më të pastër se çdo kopsht në Tokë.

Megjithëse në shkallë globale po shtyhet për legalizimin e bimës së kanabisit dhe përbërësve të saj, nuk është bërë ndonjë tymosje në hapësirë. As konsumim pijesh alkoolike, për atë punë. Gjithsesi, ndërsa gjithnjë e më shumë njerëz, përfshirë dhe turistë, vizitojnë lagjen e afërt të planetit tonë, përdorimi rekreativ i substancave mund të lejohet këtu në të ardhmen.

Hapësira është Shumë e Rrezikshme për Dehje Tani

Në intervistën e tij, Hadfield theksoi se në këtë pikë të historisë së eksplorimit të hapësirës, është ende shumë e rrezikshme të lejohet astronautët të jenë të dehur nga ndonjë substancë, qoftë alkool apo kanabis. Njerëzit që shkojnë në një stacion hapësinor duhet të jenë gjithmonë në formë maksimale, dhe nëse për shembull ka zjarr, ata veprojnë si zjarrfikës. Në çdo emergjencë tjetër, ata janë edhe linja e fundit (dhe e vetme) e mbrojtjes.

Sidoqoftë, ndërsa orbita e Tokës bëhet një vend më i mbushur dhe njerëzit ndërtojnë stacione më të mëdha me mbështetje më të mirë për jetesën, ata do të kenë të drejtë të relaksohen herë pas here. Do të duan të pinë, dhe me shumë gjasa do të duan të tymosin pak kanabis. Natyrisht, shumë varet nga ligjet, dhe tymosja në Stacionin Ndërkombëtar të Hapësirës nuk do të jetë e mundur derisa marihuana të legalizohet në nivel federal në Shtetet e Bashkuara.

Korrja e Trikomeve në Hapësirë është Ambicia e një Startup-i të Ri

Arsyeja që ish-astronauti u pyet të spekulojë për të ardhmen e kanabisit si drogë e zgjedhur në stacionet hapësinore është se ai është pjesë e bordit këshillimor të BioHarvest, një startup bioteknologjie që kërkon mënyra të rritjes së materialit bimor, kryesisht për ushqim, në bioreaktorë me lëng.

BioHarvest është marrë me kanabis prej vitesh tashmë. Kur imagjinojnë kultivimin e marihuanës në hapësirë, ata nuk mendojnë realisht për hidroponikë, e lërë pastaj për vazo plot dhe. Synimi i tyre është të kontrollojnë riprodhimin e vetëm atyre qelizave bimore që prodhojnë kanabinoidë. Në thelb, duan të rrisin dhe të korrin vetëm trikome dhe asgjë tjetër. Dhe graviteti zero mund të ofrojë avantazhe të mjaftueshme për të arritur mostrat më të mira dhe më të pastra deri tani.

Marihuana e prodhuar në bioreaktor mund të jetë ende shumë e shtrenjtë për t'u transportuar përsëri në Tokë për tu shitur nëpër dyqane rekreative, por kjo metodë inovative mund të jetë një mënyrë e lirë për të prodhuar në masë kanabinoidë të vegjël dhe të rrallë, disa prej të cilëve mund të kenë efekte unike terapeutike.