Kongresi Amerikan i bën thirrje Biden-it të falë të gjithë të dënuarit për shkelje jotëdhunshme lidhur me kanabisin

Në një letër drejtuar Joe Biden-it, përfaqësuesit Jamaal Bowman, Earl Blumenauer dhe Barbara Lee kujtuan se presidenti ka pushtet të njëanshëm për të falur të dënuarit federalë, qofshin ata aktualisht në burg apo jo. Më herët këtë vit, gati 40 kongresmenë i kërkuan presidentit të japë një falje masive për ata të dënuar për akuza jotëdhunshme të lidhura me kanabisin. Një kërkesë e ngjashme u bë edhe nga anëtarë të Senatit muajin e kaluar.

Ligjvënësit amerikanë theksojnë progresin e vazhdueshëm të nismës që synon legalizimin e kanabisit në nivel federal, si edhe faljen e të dënuarve të së kaluarës dhe pastrimin e regjistrave të tyre kriminalë. Legjislatorët i bëjnë thirrje presidentit që të ndërhyjë dhe të përdorë autoritetin ekzekutiv për të liruar shkelësit jotëdhunshëm pa pritur kalimin e ligjit të legalizimit federal.

Mijëra në burg për kanabis

Pyetja sa amerikanë janë në burg për shkelje të lidhura me kanabisin është e vështirë të përgjigjet. Një arsye është se ka statistika të ndara të popullatës së burgut për nivelin shtetëror dhe federal. Një tjetër fakt është se shumë vetë dënohen për disa akuza dhe jo të gjitha lidhen me drogën.

Megjithatë, aktivistët pro-kanabis kanë argumentuar se deri në 40,000 amerikanë të burgosur janë dënuar vetëm për kanabis. Është edhe më e vështirë të vlerësohet se sa prej tyre janë shkelës jotëdhunshëm.

Një cikël varfërie

Plot 350,000 amerikanë u arrestuan për kanabis në vitin 2020, dhe shumica dërrmuese e rasteve ishin për posedim të thjeshtë. Kritikut e sistemit aktual gjyqësor argumentojnë se policia dhe gjykatat kanë krijuar një cikël të keq ku njerëzit nga komunitetet e varfra dëmtohen edhe më shumë financiarisht, me tarifa ligjore dhe gjoba penale.

Autorët e letrës theksuan paragjykimet racore të luftës ndaj drogës. Në vitin 2020, Unioni Amerikan për Liritë Civile raportoi se amerikanët me ngjyrë kishin 3.64 herë më shumë mundësi të arrestoheshin për kanabis sesa të bardhët, pavarësisht përdorimit të njëjtë të kanabisit. Për të korrigjuar këto padrejtësi, ligjvënësit propozojnë që presidenti të anulojë të gjitha gjobat dhe tarifat federale për shkeljet me kanabis.