Kosta Rika: Kongresi Hapi Hap të Parë drejt Legalizimit të Kanabisit Mjekësor

Kongresi i Kosta Rikës votoi të martën për një projektligj që propozon të lejojë kultivimin dhe prodhimin e kanabisit psikoaktiv për përdorim mjekësor. Nëse dekretohet në ligj, projektligji do ta bënte Kosta Rikën një tjetër vend latino-amerikan që legalizon kanabisin mjekësor.

Megjithatë, nisma ka ende një rrugë të gjatë për të bërë pasi has kundërshti të fortë. Presidenti i Kosta Rikës, Carlos Alvarado, i cili është kundër, ende mund të vendosë veto mbi projektligjin. Në këtë rast, përkrahësit e reformës do të duhet të fitojnë raundin e dytë të votimit, kësaj here me shumicë të cilësuar.

Nismë që Ka Kërkuar Kohë

Projekti 21.388 u prezantua për herë të parë mbi dy vite më parë dhe ka përparuar ngadalë për shkak të kundërshtimeve të forta, kryesisht nga Presidenti Alvarado si edhe Ministri aktual i Shëndetësisë. Megjithatë, u miratua pas debatit të parë me 33 vota pro dhe 13 kundër.

Autorja e nismës është Zoila Volio, një ligjvënëse e pavarur me eksperiencë në inxhinierinë bujqësore. Volio i tha Reuters se nuk besonte që miratimi i ligjit do të çonte në rritje të konsumit rekreativ në vend. Ajo shprehu shpresën që Presidenti ta kuptonte këtë dhe të vendoste nënshkrimin e tij mbi ligj.

Përpos sigurimit të aksesit të lehtë për pacientët mjekësorë te kanabisi dhe produktet farmaceutike të bazuara te kanabisi, ligji i propozuar do të lejonte gjithashtu Kosta Rikën t’i bashkohet tregut të madh global të kanabisit mjekësor dhe kërpit industrial.

Nxitje e Nevojshme për Sektorin Bujqësor

Sipas PROCOMER, rregullatori i eksporteve në Kosta Rikë, tregu global për këtë industri vlerësohet në 5.7 miliardë dollarë në vit. Duke u parë kështu, reforma ligjore për kanabisin mund të jetë lajm i mirë për fermerët vendas.

Teksti i projektligjit përmend posaçërisht nevojën për rritje ekonomike në komunitetet rurale. Dhe heqja e kufizimeve mbi kultivimin e kërpit për përdorime industriale dhe farave të kërpit për ushqim mund të sjellë të ardhura të reja për fermerët e vegjël. Gjithashtu, mund të hapet një industri e re për përpunimin e kërpit dhe kanabisit mjekësor të kultivuar lokalisht.