Gjermania: Qeveria e ardhshme diskuton detajet e legalizimit të kanabisit

Teksa tre partitë kryesore të Gjermanisë po punojnë për detajet e marrëveshjes së koalicionit, çështja e legalizimit të përdorimit të kanabisit për të rriturit është një pjesë kryesore e negociatave. Administrata e ardhshme, që pritet të marrë detyrën në fillim të dhjetorit, është shumë më e hapur ndaj zgjidhjes së kësaj çështjeje se sa paraardhësit nën Angela Merkel.

Nxitja multi-miliardëshe

Para vitit 2019, kanabisi ishte i klasifikuar si një drogë e Klasës IV—kategori që përfshin edhe heroinën dhe kokainën. Kjo do të thoshte që mohoheshin përfitimet medicinale. Tani, është substancë e Klasës I dhe mjekët në Gjermani kanë lëshuar receta me vlerë €19 milionë vetëm në gjysmën e parë të vitit 2021. Pacientët përdorin këtë ilaç për probleme si dhimbjet kronike dhe epilepsia.

Tregu rekreativ mund të ofrojë një mundësi edhe më të madhe. Në Kanada, ku ligji i plotë për legalizimin hyri në fuqi në 2018, shitjet vjetore kanë arritur në €2 miliardë. Qeveria e ardhshme gjermane e sheh këtë si një shans të madh dhe një stimul të mirëpritur për ekonominë e dëmtuar nga pandemia.

Analizat parashikojnë se numri i përdoruesve aktivë—qoftë mjekësorë apo rekreativë—do të arrijë 1 milion në rast të legalizimit të plotë. Kjo do të thotë që madhësia e tregut mund të variojë nga 3.2 deri në 4 miliardë euro në vit.

Përfitimi nga reforma që publiku e do

Prodhuesit kryesorë të kanabisit që operojnë ndërkombëtarisht po nxitojnë për të hyrë në tregun evropian, pasi Gjermania mund të mos jetë vetëm tregu i parë ligjor në kontinent, por edhe më i madhi.

Ndërkohë, vetëm tre kompani gjermane kanë licenca për të kultivuar kanabis në vend. Dhe ato lejohen të kultivojnë vetëm në ambiente të jashtme, të rrethuara me mure të larta betoni.

Johannes Gallois, CEO i GECA Pharma në Këln, tha për Deutsche Welle se presin që industria vendase të përfitojë ndjeshëm nga legalizimi. Ai gjithashtu shprehu dëshirën që vendimmarrësit të përfshijnë aktorët e industrisë në diskutim.

Ka një ndryshim të qartë në opinionin publik për legalizimin e kanabisit në Gjermani. Sondazhi i fundit i realizuar nga Shoqata e Hemp-it të vendit në tetor tregoi që, për herë të parë, më shumë njerëz janë shprehur pro reformës sesa kundër. Sipas sondazhit, 49% e gjermanëve e përkrahin idenë e legalizimit dhe rregullimit të kultivimit dhe shitjes së kanabisit. 46% mbeten kundër.