Претседателот Бајден даде изјава во четвртокот со која повика на сеопфатна реформа на политиката за марихуана во земјата. Во последниот изборен циклус, тој беше единствениот демократски кандидат за претседател кој се противеше на легализацијата на канабис. Сепак, како што се приближува крајот на неговиот прв мандат, тој повторно го преиспитува својот став и предлага радикална промена.

Општо помилување за сите прекршители за едноставно поседување

Првата мерка што ја предложи претседателот е да се даде помилување на сите прекршители на ниско ниво за марихуана чие единствено дело е едноставното поседување. Во овластувањата на Бајден е веднаш да ги помилува илјадниците федерални осудени лица. Дополнително, тој ги повика и гувернерите истото да го сторат за лицата кои служат казна за слични дела во државните затвори.

Според претседателот, оваа реформа одамна требаше да се случи бидејќи едноставното поседување канабис не е доволно сериозен прекршок за да се уништат животите на инаку законослушни граѓани. Не само што нивните животи се нарушуваат со затворски казни, туку подоцна им се одзема можноста за работа, едукација и домување и се соочуваат со друга дискриминација.

Бајден нагласи дека иако марихуаната ја користат и белци и етнички малцинства во речиси еднаква мера, црначките и латино заедници најмногу ја носат тежината од војната против дрогите. Стопката на апсења и затворања е далеку поголема кај нив во споредба со белците.

Апел за ревизија на законите

Сепак, помилувањето за прекршителите на ниско ниво е само прв чекор. Целта е уште од старт тие да не бидат процесирани низ судскиот и затворскиот систем. Во таа насока, тој предложи државните агенции да го ревидираат тековното рангирање на растението канабис и неговите деривати.

Во моментов, канабисот е во Распоред I – најстрогата категорија на контролирани супстанци – заедно со хероин, додека потенцијално поопасните дроги како фентанил и метамфетамин се во помалку рестриктивниот Распоред II.

Вреди да се напомене дека токму овие две супстанци ја поттикнуваат тековната смртоносна епидемија со предозирање во САД, додека е технички невозможно да се почине од консумација на канабис. Сепак, и покрај потребата за реформа на застарената и неуспешна политика за канабис, Бајден истакна дека ограничувањата за користење кај малолетни лица, како и рестрикции за маркетинг и трговија треба да останат на сила.