Како да им се отвориш на родителите или роднините за марихуаната

• 1. Води го разговорот полека!
• 1. a. Прво идентификувај го ставот на твојот соговорник
• 2. Држи лесна атмосфера, не притискај и постепено руши го табуто
• 2. a. Разбивање на табуто
• 3. Повикај ја науката за поддршка! Факти на сцена
• 4. Биди искрен и јасно кажи ги твоите намери
• 5. Не се откажувај!
• 6. Последниот збор

Кога станува збор за марихуана, како стонери, јасно гледаме дека придобивките ги надминуваат недостатоците кои доаѓаат со нејзината консумација. Всушност, за нас придобивките се толку многубројни што ни треба уште некоја рака да ги изброиме.

Но, и за жал, не сите се согласуваат 100% со оваа перспектива. Често ќе се најдеме во дискусии и обиди да ги браниме добрите страни на оваа магична билка со оние кои секогаш одбивале да ја пробаат, т.е. луѓе кои сакаат да расправаат без реални факти. Диши, не се лути. 

И тоа е во ред кога се работи за случајни луѓе кои можеби си ги сретнал на некој собир, но што кога си вистински стонер, а знаеш дека твоето семејство или блиските пријатели се целосно против употребата на марихуана? Ситуацијата може да стане комплицирана. 

Значи, ако ти треба начин да се отвориш пред родителите, роднините или блиските пријатели за тоа што користиш марихуана, си на вистинското место. Еве неколку совети за тоа како да го пристапиш разговорот.

1. Води го разговорот полека!

Првото нешто што треба да си го кажеш кога сакаш да им се отвориш на семејството, пријателите или роднините за твојата употреба на канабис е „оди полека“. Мора да бидеш свесен дека ќе ги шокираш со мисли што се косат со нивните ставови, па затоа полека е клучно. 

Ако твоето семејство или пријатели немаат апсолутно никаков појма дека често користиш трева, за нив ова може да биде огромно изненадување, па очекувај некои интензивни реакции, кои ако не се случат — уште подобро. Сето тоа зависи до кого зборуваш и колку цврсти се нивните ставови за марихуаната.

Прво идентификувај го ставот на твојот соговорник

Првиот чекор кон разговор со семејство или роднини за марихуана е да одвоиш момент и да ја разбереш нивната гледна точка за темата. Постави си некои од следниве прашања за да знаеш на што ќе се соочиш:

• Дали оваа личност е генерално затворена или отворена? 
• Дали некогаш пробала марихуана?
• Дали е инаетлива личност?
• Дали мислиш дека би ја ислушал аргументацијата и би се обидел да ја разбере другата перспектива?
• Колку години има? Какво било нејзиното детство и односот со родителите?
• Дали е љубопитна личност?

Ваквите прашања и многу други ќе ти дадат подобра сеопфатна слика за личноста со која ќе зборуваш, и со тоа ќе можеш да го избереш вистинскиот пристап. Ако знаеш дека се инаетливи, наполни се со трпение, а ако се луѓе на факти, подготви бројки, и така натаму. 

2. Држи лесна атмосфера, не притискај и постепено руши го табуто

Идеално е да се потрудиш да создадеш лесна и опуштена атмосфера за да го започнеш разговорот за марихуана. Биди подготвен на негативни реакции и размисли однапред како смирено да ги одговориш и вратеш атмосферата во пријателски колосек ако работите излезат од контрола. 

Проблемот е што луѓето кои немаат поим што всушност е канабис можат да реагираат пресилно, па дури и апсурдно кога ќе чујат дека некој што им е близок го користи, особено ако станува збор за нивни роднина или пријател. Со тоа на ум, не дозволувај нивните зборови да те погодат и испровоцираат, запомни ние сакаме мир, не кавга.

Ако видиш дека личноста со која зборуваш почнува да се вознемирува, повлечи се и дај им простор. Ако успееш да им презентираш неколку аргументи зошто канабисот не е она што мислат, запреј го разговорот, и дај им време самите да ги преразмислат работите што ги слушнале.

Понекогаш кога премногу притискаш, ја одалечуваш целта. Држи лесна атмосфера и дај им време самите да сфатат. 

Најверојатно нешто што си го спомнал ќе им остане во глава — и тоа е совршено, така и почнува. Прва дискусија — можеби многу силна, втора — веќе помалку, па уште неколку неформални муабети и полека се менува начинот на размислување.

Разбивање на табуто

Клучен дел од кажаното е „неколку разговора“ — ете зошто. Кога за прв пат ќе отвориш ваков муабет, не очекувај тие да ги остават животните предрасуди за само еден разговор (ако се случи — супер, ама не сме во бајка).

Затоа, зборувај за канабисот често, ама опуштено — спомни нешто што си го слушнал на вести, или некој познат спортист што користи трева, и полека ќе ги омекнеш строгите ставови на таа личност, често без да забележат. Ќе дојде момент кога можеби ќе се смеат на истите стонер шеги што тебе те засмејуваат во филмови и серии. 

Колку повеќе зборуваш за темата, побрзо ќе го разбијеш табуто што го изградиле за марихуаната. Но, сето тоа нека биде природно, без да си нападен или премногу чест, да не предизвикаш сомнеж. 

3. Повикај ја науката за поддршка! Факти на сцена

Ако личноста со која зборуваш е посебно инаетлива, време е да го извадиш силното оружје и да ја повикаш науката за поддршка. Не сакавме веднаш да им ја треснеме во лице фактичката поткрепа за нашите ставови, но ако не ни даваат друг избор — што да правиме?

Постојат бесконечни научни студии кои докажуваат колку марихуаната е корисна во многу различни аспекти. Одвој време и направи истражување за да бидеш подготвен како адвокат. Барај теми што на соговорникот би му биле интересни — тоа помага! 

На пример, дали оваа личност има проблеми со спиењето? Еве ти отворена врата. Дали се бори со хронична физичка болка? Имаме решение и за тоа. Проблеми со кожа? И за тоа има лек. Мисли добро и играј паметно со твоите адути. 

Освен со научни факти, можеш да го искористиш и правниот аспект за твоја корист. Дали не е точно дека канабисот добива се поголема почит откако е легална супстанца во се повеќе земји? А што со бројките? Дали некој некогаш починал од консумација на марихуана? Обиди се да се расправаш со сето ова, да видиме. 

4. Биди искрен и јасно кажи ги твоите намери

Клучно нешто кога се отвораш за твојот однос со марихуана е искреноста. Кога пристапуваш до некој што никогаш не ни помислил да проба трева, понекогаш доволно е да му ја покажеш не целата, туку твојата слика. 

Тоа што сакаме да кажеме е — објасни зошто уживаш да консумираш канабис, на кој начин тревата ти е дел од секојдневието, што мислиш за неа, и што очекуваш од самиот разговор. Во суштина, претпоставуваме дека сакаш да ја имаш слободата да правиш што сакаш без да се грижиш за погрешните впечатоци кај другите. Зошто, тогаш, тоа да не го кажеш директно?

Исто така, станува збор и за почит. Јасно кажи дека не бараш одобрување дали ќе продолжиш или ќе престанеш со пушењето — затоа што и така ќе престанеш само ако сам/а сакаш, не поради друг. Но бидејќи ти е грижа и ги почитуваш, сакаш да бидеш отворен/а за оваа тема и повеќе да не криеш важен дел од себе. 

Да си искрен е најдобриот совет што можеме да го дадеме за било што во животот. Ако знаеш дека твоите намери се искрени и немаш лоша намера, се остави на другите дали ќе го прифатат или не. 

5. Не се откажувај!

На крај, ако сакаш да се отвориш за марихуаната пред твоите родители или роднини, важно е да не се разочараш после неколку неуспешни обиди. Овие „пропаѓања“ се само тестови дали навистина сакаш да истераш до крај. 

Не велиме да не престанеш додека не добиеш „да“ — можеби навистина ќе изнервираш некого. Но држи го оптимизмот, луѓето можат да се сменат со време, па дури и првичното „не“ не значи дека се е изгубено. Кој знае, можеби таа личност почне и самата да користи трева и деривати.

Од сопствено искуство, две години откако моите ми влегоа во соба и врескаа кога дознаа дека пушам трева, после тоа со задоволство си одгледував свои растенија во семејната градина. И јас се изненадив како конечно успеав да им го сменам мислењето. Како? Со комбинирање на горенаведените совети, и без откажување!

6. Последниот збор

Да се отвориш за марихуана пред родителите или роднините може да застрашува на почеток, знаеме. Но ако нешто треба да запомниш, тоа е дека понекогаш мора да поминеш низ тежок период за да напредуваш подоцна. Ако не, животот би бил предобар и ништо не би научиле. 

Комфорот е за мрзливите, затоа излези од удобноста и најди начини да постигнеш сѐ што ќе замислиш. На крај, „не“ ти е веќе одговорот, па што имаш да изгубиш? Среќно со убедувањето за твоите канабис навики пред блиските! Не заборавај да ни пишеш ако успеа!