Коста Рика: Конгресот го направи првиот чекор кон легализација на медицинскиот канабис

Конгресот на Коста Рика во вторникот гласаше за предлог-закон кој предлага дозвола за одгледување и производство на психоактивен канабис за медицинска употреба. Доколку биде потпишан, законот ќе ја направи Коста Рика уште една латиноамериканска земја што го легализира медицинскиот канабис.

Сепак, иницијативата има уште долг пат бидејќи се соочува со силно противење. Претседателот на Коста Рика, Карлос Алварадо, кој е против предлог-законот, сè уште може да стави вето. Во тој случај, поддржувачите на реформата ќе треба да победат и во вториот круг од гласањето, овојпат со квалификувано мнозинство.

Долго време во подготовка

Проектот 21.388 беше предложен пред повеќе од две години и напредуваше бавно поради силното спротивставување, особено од страна на претседателот Алварадо, како и актуелниот министер за здравство. Сепак, беше одобрен по првата дебата со 33 гласови „за“ и 13 „против“.

Авторката на иницијативата е Зоила Волио, независна пратеничка со искуство во агроинженерство. Волио изјави за Ројтерс дека не верува оти усвојувањето на законот ќе доведе до пораст на рекреативна консумација во државата. Таа се надеваше дека претседателот ќе го разбере тоа и ќе го потпише законот.

Освен што на пациентите им овозможува полесен пристап до канабис и фармацевтски продукти од канабис, предложениот закон исто така ќе ѝ овозможи на Коста Рика да се приклучи на огромниот глобален пазар за медицински канабис и индустриска коноп.

Долгоочекуван поттик за земјоделскиот сектор

Според ПРОКОМЕР, регулатор за извоз од Коста Рика, глобалниот пазар за оваа индустрија вреди 5,7 милијарди долари годишно. Со оваа перспектива, реформата на законите за канабис може да биде добра вест за локалните земјоделци.

Текстот на законот особено ја истакнува потребата за економски раст во руралните заедници. Отстранувањето на ограничувањата за одгледување на коноп за индустриски цели и семе од коноп за храна може да значи нов извор на приход за малите земјоделци. Може да доведе и до создавање на цела нова индустрија за преработка на локално одгледуван коноп и медицински канабис.