Паша за идни еднорози? Американската канабис индустрија ќе достигне 50 милијарди долари до 2026

Brightfield Group, компанија од САД која обезбедува извештаи за CBD и канабис индустријата, предвидува дека растот на секторот нема да забави во наредните години и ќе достигне неверојатни 50 милијарди долари до 2026.

Досега, растот беше поттикнат од напорите за легализација во одделни држави низ земјата, но извештајот зема предвид и повеќе од реалната можност дека долгогодишната забрана на канабис наскоро ќе биде укината и на федерално ниво.

Игралиште за мулти-милијардни корпорации

Двата предлога-закони кои моментално ги разгледуваат членовите на американскиот Конгрес имаат цел да го ,,дедиспечуваат" канабисот, односно да го отстранат од листата на забранети супстанции. Меѓу другото, ова би значело и моментално „отворање на границите“ меѓу државите кои веќе имаат изграден медицински или рекреативен канабис-програм.

Ова значи проблеми за малите продавници и други мали бизниси поврзани со канабис кои се размножија во многу „зелени“ држави. Без федерални бариери кои би ги спречиле националните компании, помалите бизниси ќе имаат големи потешкотии да конкурираат со лидерите на индустријата.

Последното преземање кое создаде најголема канабис корпорација во светот е јасен доказ за новата ера што доаѓа. Исто така, напорите на активистите за канабис да им дадат шанса на малцинствата да остварат приходи од новиот сектор по децениската војна против дрогата — војна што опустоши цели заедници — можеби нема да преживеат во идното деловно опкружување. Инцијативи како вработување црни директори да раководат со корпорации за марихуана тешко дека ќе го променат трендот.

Како и да е, федералната легализација на канабис изгледа неизбежна. Таа го надмина прашањето за граѓански права. Сега сѐ се врти околу приходи и даноци, а корпоративна Америка сѐ повеќе лобира за крај на забраната.

Источниот брег ќе биде главен двигател на растот

Дури и ако САД не успеат да го легализираат канабисот на национално ниво, континуираниот бран на реформи на ниво на држави ќе биде доволен за понатамошен раст на канабис секторот. А токму источните држави во моментов имаат најмногу иницијативи за легализација на оваа супстанца. Источниот брег има и многу големи градови кои ќе се претворат во огромни пазари за канабис кога канабисот ќе стане легален.

На друго место низ светот, носителите на одлуки внимателно ги следат случувањата во Северна Америка. Продажбата на легална марихуана веќе достигна 21 милијарда долари глобално. Поголемиот дел од овие приходи и понатаму се генерираат во САД и Канада, но поддржувачите на канабис се залагаат за реформи и во Велика Британија.

За разлика од Вегас, тоа што се случува во САД не останува во САД, и брановите на легализација веројатно ќе се прошират и на други континенти.