Повеќе трева, помалку апчиња и прашоци: Промени во употребата на дроги за време на пандемијата

Истражувачи од Универзитетот во Њујорк анкетираа 128 возрасни лица од популација поврзана со најчеста употреба на супстанции—посетители на електронски денс музика забави—за да ги проучат нивните обрасци на употреба на дроги во текот на пандемијата.

Открија дека популарноста на потешките супстанции драстично опаднала, додека канабисот станал сè поомилен и попопуларен од кога било. Овие резултати беа објавени минатиот месец во списанието Substance Use & Misuse.

Од ЛСД до Апстиненција

Студијата се фокусираше на периодот од март до мај 2020 година, кога беа воведени првите мерки за социјално дистанцирање. Учесниците беа прашани како ограничувањата влијаеле врз нивната консумација на некои од најпопуларните забавни дроги.

Не беше изненадување што огромното мнозинство испитаници пријавиле намалена употреба на сите дроги: 78,6 проценти помалку за кокаин, 71,1 – за МДМА (или моли), и 68 – за ЛСД.

Очигледната причина беше затворањето на клубовите кога новиот вирус брзо се рашири низ Њујорк и на други места. Авторите исто така сугерираат дека забраната за патувања ја наруши дистрибуцијата на нелегални дроги, поради што тие беа помалку достапни и поскапи.

Зад затворени врати

Тревата, пак—иако често се користи во друштво—не е типична „забавна дрога“, и нејзината употреба во истиот период се зголемила. Така, 35 проценти од испитаниците рекле дека пушеле уште повеќе трева како што напредуваше пандемијата, а кај уште една третина, употребата останала иста.

Една можна причина е што луѓето навикнати на редовна опијанетост ги замениле другите дроги со канабис, кој сè уште бил лесно достапен. Истражувачите предлагаат и уште едно објаснување. Иако се’ уште нема цврсти научни докази, се смета дека канабисот може да биде ефикасен во третманот на депресија, анксиозност и стрес. Принудата да се остане дома за време на карантинот доведе до зголемување на овие состојби како кај пошироката популација, така и – уште повеќе – кај оние што сакаат забави.