Шпанија ќе ја легализира продажбата на медицински канабис годинава

Шпанија најверојатно ќе се придружи на растечката листа на земји што го третираат канабисот како лек и дозволуваат продажба на дрогата на пациенти со одредени состојби. Иницијативата за создавање легален и регулиран пазар излезе од собраниската подкомисија и се очекува да биде одобрена од Комисијата за здравство во четврток. По ова финално гласање, ќе биде задача на Шпанската агенција за лекови да подготви регулатива и да воспостави систем за легална продажба на лекот преку аптеките во наредните шест месеци.

Земјата има една од најлибералните политики за канабис во светот, при што Барселона – а не Амстердам – се појавува како новата европска престолнина на канабисот. Сепак, законите заостануваат зад либералниот однос на шпанското општество кон дрогата и постои потреба од поцврста регулативна рамка.

Листата на состојби е ограничена, но може да се прошири

Сѐ уште не е јасно каков вид на доктори ќе можат да препишуваат канабис медицина на своите пациенти и дали прво ќе треба да се исцрпат другите терапевтски опции. Сепак, нацрт-законот јасно наведува за кои состојби може да се користат фармацевтски производи од канабис. Тие вклучуваат контрола на болка кај пациенти со и без рак, мачнина и повраќање предизвикани од хемотерапија, мултиплекс склероза, како и ендометриоза и некои форми на епилепсија.

Законот сугерира дека, се додека постојат научни докази, на оваа листа може да се додадат и други индикации.

Широка политичка поддршка за реформата

Според Карола Перез, претседателка на Шпанската опсерваторија за медицински канабис и основач на здружението на пациенти dosemociones, авторите на иницијативата морале да се борат за секоја клаузула и секоја медицинска состојба што влегла во финалниот нацрт. Сепак, поддршката за реформата е несомнена и вклучува поддршка од скоро сите партии, освен десничарските PP и Vox.

Активистите и кампањерите го гледаат потегот како знак за понатамошна либерализација на законите за канабис во Шпанија. Сепак, законот ја истакнува потребата од безбедносни мерки кои ќе спречат медицинскиот канабис да заврши на црниот пазар и да го зголемат користењето на дрогата од здравиот дел од популацијата.