Тајланд го укина забраната за канабис и ги отвори вратите за легална трговија

Тајланд стана првата земја во регионот што ги укина сите ограничувања за одгледување канабис, било од компании или приватни лица. Сега, секој има право да одгледува до шест растенија дома и да ги продава производите. Единствениот услов е регистрација во локалната самоуправа.

Претходно, владата ги објави своите планови за поддршка на новата политика, при што ќе подели еден милион растенија бесплатно на сите што размислуваат да станат фармери на канабис. Во исто време, рекреативната употреба на канабис и понатаму е незаконска, и секој што ќе биде фатен како пуши на јавно место ќе биде уапсен и казнет за јавна вознемиреност.

Перспективите се уште нејасни

Никој засега не знае точно што значи новата политика или како ќе се развива ситуацијата. Законот наведува дека различните производи од марихуана што може да се продаваат не смеат да содржат повеќе од 0,2% THC, главната психоактивна состојка во билката. Секој што ги следи глобалните политики за канабис знае дека оваа дефиниција се однесува на коноп – не-психоактивен вид на канабис што се одгледува за влакна, семе, масло и за многу други индустриски цели.

Не е јасно како властите планираат да ги следат стандардите ако растението може да се одгледува било каде и од речиси секого. Општо е познато дека во тропски држави како Тајланд, генетската промена кај претходно не-психоактивните типови коноп ќе се случи брзо и ќе доведе до постепено зголемување на THC.

Без строг контрол на тоа какви клонови и семиња се користат секоја сезона, секое растение брзо ќе го прекрши правилото за помалку од 0,2 проценти. Експертите велат дека со новиот закон всушност е декриминализирана секоја форма на марихуана во државата.

Трговијата започна уште пред легислативата

Движењето во оваа насока беше постепено. Тајландските власти имаа уникатен инкрементален пристап, дозволувајќи најпрво трговија со стебла, корени и листови, а потоа и со цветови, семиња и лисја. Нацијата беше и прва во регионот што ја легализира медицинската употреба на канабис во 2018.

Владата се надева дека новата индустрија ќе помогне да се забрза економското заздравување по Ковид, ќе даде поттик на земјоделието и ќе привлече уште повеќе туристи во Тајланд. Со ветување за брзи реформи, многу компании одамна го прифатија новиот посев, користејќи канабис во козметика, храна, пијалоци, лекови, па дури и како додаток на пици.