Владата на Луксембург одобри закон за легализација на канабис

Минатата недела, владата на Луксембург одобри закон кој означува уште еден чекор напред кон широка легализација на канабис во земјата. Со законот ќе се измени застарениот закон од 1973 година што ги уредуваше правилата за медицинска употреба на канабис и насоките за борба против зависноста.

Сознанието дека строгата политика кон дрогите не успеа да го намали користењето на психоактивни супстанции ја наведе коалицијата на Либералите, Социјалдемократите и Зелените да објават планови за промена на политиката за дроги. Планот изготвен во 2018 година од Министерот за здравство беше одложен поради Ковид-19 пандемијата, но беше обновен во 2021 година. На крајот, ќе се дозволи продажба на рекреативен канабис.

Домашно одгледување и поседување за лична употреба

Додека крајната цел е создавање на систем со производствени капацитети и синџир на снабдување, како и државна контрола на квалитетот, новиот закон овозможува и домашно одгледување на канабис. Возрасните ќе имаат право да одгледуваат до четири растенија, но ќе можат да ја користат бербата само дома. Јавното консумирање останува забрането.

Сепак, владата реши да ги олесни казните за едноставно поседување. Сега, поседувањето до 3 грама марихуана ќе се смета за прекршок и ќе се казнува со глоба од 25 евра – 10 пати помалку отколку претходно.

Средство за спречување нелегална трговија

Додека иницијативите за легализација во САД често се гледаат како начин за полнење на државниот буџет преку даноци на марихуана, во Луксембург и другите европски земји декларирана цел е парите да се изземат од криминалните групи. Како и да е, сите даноци што ќе се соберат од легалната продажба, ќе се користат за програми за превенција на зависност и едукација.

Луксембург е една од првите европски држави што се движи кон посмислена политика за канабис. Во декември 2021, Малта ја легализира употребата и одгледувањето на оваа супстанција, а Швајцарија одлучи да спроведе повеќе пилот-програми во градови за ограничен број рекреативни корисници. Новата влада на Германија исто така вети дека ќе воспостави регулиран пазар за канабис пред следните избори.