Џастин Бибер го започнува својот бизнис со канабис со „Peaches“ џоинти

Џастин Бибер склучи партнерство со Palms, компанија од Лос Анџелес која произведува канабис преролни и ги продава во Калифорнија и Невада. Пакување од 7 џоинти чини 32 долари. Брендот на пејачот ќе се вика „Peaches“, исто како песната од неговиот последен албум.

Бибер не е првата славна личност во канабис индустријата. Реперот Џеј-Зи има едно од највисоките позиции во Parent Co., која неодамна објави дека назначи прв црн извршен директор во секторот. Други познати личности продаваат различни производи од канабис: од CBD бонбони до THC пијалоци.

Од скандали до мисија

Во изјава преку е-пошта, пејачот рече дека сака супстанцијата да се дестигматизира и да биде поедноставно достапна за луѓето на кои им е потребна. Посебно ги истакна пациентите со ментални проблеми. Веројатно затоа што и самиот Бибер се борел со депресија и анксиозност уште од младите години кога неговиот успех го направи дете ѕвезда.

Постојат контроверзии дали медицинскиот канабис навистина користи на луѓе со ментални состојби. Самиот Бибер зборуваше дека првпат пробал марихуана како тинејџер и на крајот развил зависност.

Имаше неколку скандали поврзани со користењето канабис од страна на пејачот. Во 2014 година, по инцидент со возење под дејство во Флорида, повеќе од 270.000 луѓе потпишаа петиција до владата да го депортира Бибер назад во неговата родна Канада. Во друг случај, се најде на насловни страници откога стана познато дека пилотите на неговиот приватен авион морале да носат маски од страв да не вдишат чад од канабисот кој Бибер и неговите пријатели го произведувале во кабината.

Сега, пејачот гледа на своето учество во канабис секторот како начин да исправи дел од неправдите. Дел од приходите од продажбата на „Peaches“ ќе бидат донирани на Last Prisoners Project, невладина организација што се залага за ослободување на лицата осудени за марихуана. Друг проект што ќе добие поддршка од Бибер е Veterans Walk and Talk.

Приближување и нормализирање на тревата

За Palms, односно Tres Palms Inc. како што официјално се нарекува компанијата, соработката со Џастин Бибер е возбудлива можност. Начинот на кој славните рекламираат продукти со канабис се совпаѓа со мисијата на Palms за нормализација и отстранување на стигмата поврзана со оваа билка и супстанцијата.

Сигурно е дека зделката ќе биде профитабилна за двете страни, иако финансиските детали не се познати.