Конгресот на САД го повикува Бајден да ги помилува сите осудени за ненасилни прекршоци поврзани со марихуана

Во писмо до Џо Бајден, претставниците Џамаал Боуман, Ерл Блуменауер и Барбара Ли потсетија дека претседателот има еднострана моќ да ги помилува федералните осуденици, без разлика дали во моментот се во затвор или не. Порано оваа година, речиси 40 конгресмени го замолија претседателот да издаде масовно помилување за лицата осудени за ненасилни прекршоци поврзани со марихуана. Слично барање минатиот месец испратија и членови на Сенатот.

Американските законодавци укажуваат на тековниот напредок на иницијативата чија цел е да се легализира канабисот на федерално ниво, како и да се помилуваат поранешните престапници и да се избришат нивните кривични досиеја. Законодавците го повикуваат претседателот да интервенира и да ја искористи својата извршна власт за да ги ослободи ненасилните осуденици, без да се чека донесувањето на законот за федерална легализација.

Илјадници во затвор поради канабис

Прашањето колку Американци се во затвор поради прекршоци поврзани со марихуана е тешко да се одговори. Една причина е што постојат одделни статистики за затворската популација на сојузно и на државно ниво. Друга е фактот што многу луѓе се осудени за неколку дела, а дел од тие не се поврзани со дроги.

Сепак, про-канабис активистите тврдат дека дури 40.000 затворени Американци се осудени исклучиво поради канабис. Уште потешко е да се процени колку од нив спаѓаат во категоријата на ненасилни осуденици.

Сиринска на сиромаштија

Фрапантни 350.000 Американци биле уапсени поради марихуана во 2020 година, а огромното мнозинство од тие случаи се само за поседување. Критичарите на сегашниот судски систем тврдат дека полицијата и судовите создале порочен круг во кој жителите од сиромашните заедници уште повеќе се уништуваат финансиски со судски такси и кривични казни.

Авторите на писмото го потенцираа расниот дисбаланс на војната против дрогите. Во 2020 година Американската унија за граѓански слободи објави дека црните Американци имаат 3,64 пати поголема веројатност да бидат уапсени за канабис во однос на белците, и покрај истата застапеност на користење канабис. За да се поправат овие неправди, законодавците предлагаат претседателот да ги поништи сите федерални казни и такси за прекршоци поврзани со канабис.