Марихуана во Кина: Водич за правниот статус на канабисот

• 1. Дали марихуаната е легална во Кина?
• 1. a. Поседување
• 1. b. Продажба
• 1. c. Одгледување
• 2. Дали cbd е легален во Кина?
• 3. Дали е легално да се праќаат семки од канабис во Кина?
• 4. Медицински канабис во Кина
• 5. Индустриски коноп во Кина
• 6. Историја и политика
• 6. a. Политика
• 7. Добро е да се знае

Најнаселената земја во светот, со повеќе од 1,4 милијарди луѓе, Кина не би ви била првата асоцијација кога станува збор за употребата на канабис. Иако канабисот во Кина е нелегален, а општата перцепција за неговата медицинска и рекреативна употреба е негативна, сепак државата има силна индустрија за индустриска коноп, поради што е водечки производител на ова растение во светот. Но, и покрај подемот на индустријата за коноп и CBD, кинеските закони за марихуана гарантираат дека казните за употреба, поседување и дистрибуција на марихуана се едни од најстрогите во светот денес. Денес, детално ќе ја разгледаме историјата, легалниот статус и употребата на канабисот во Кина. Сепак, пред да навлеземе во детали и да одговориме на вашите прашања за марихуаната во Кина, да започнеме од основите.

1. Дали марихуаната е легална во Кина?

Во комунистичка земја која и понатаму во голема мерка се противи на западните култури и закони, не е изненадување што марихуаната е крајно нелегална во Народната Република Кина. Поседувањето, дистрибуцијата и употребата на канабис се против законот, а растението е масовно стигматизирано и деградирано од страна на Владата како растение без или со минимална медицинска корист.

Всушност, во последните години Националната комисија за контрола на наркотици спроведе дигитална кампања насочена кон младината во Кина во рамки на националните напори да се намали употребата на марихуана кај младите. Дури и покрај сопствените граници, Владата ги таргетираше кинеските студенти на странство, предупредувајќи ги да избегнуваат користење канабис додека живеат или патуваат надвор од државата. Земјава има цврст став против марихуаната и домашните закони за марихуана нема да се променат во скоро време.

Поседување

Иако во минатото кинеската полиција наводно знаела да „затвори очи“ пред употребата на канабис, денес казните за поседување се исклучително сурови и драстични. Лицата фатени со повеќе од 5 кг канабис може да добијат смртна казна. За сериозните прекршители казните се движат од најмалку пет години затвор, па сѐ до доживотна казна затвор.

Оние што ќе бидат затекнати со помали количини може да добијат полесни казни, како што се:

• Две недели затвор
• Парична казна до 1.000 јуани

Затоа, не треба да се споменува дека да бидете фатени со марихуана во Кина е апсолутно искуство кое сакате да го избегнете.

Продажба

Слично како и поседувањето, продажбата или дистрибуцијата на канабис во Кина останува забранета и се казнува со екстремно строги казни. Секој што ќе биде фатен при продажба може да очекува долга затворска казна, додека смртна казна е застрашувачка можност за оние фатени во поригорозни и поавторитарни региони или со поголема количина. Се сугерира дека некои градови имаат потолерантен пристап, но ризикот од учество е едноставно премногу голем.

Одгледување

Како што и се очекува, одгледувањето канабис во Кина е не дозволено и оние што ќе бидат фатени можат да очекуваат затворска казна. Иако е забрането да се одгледува марихуана во урбаните средини, ова растение се среќава на повеќе локации низ земјата, најчесто расте диво. И покрај строгите и потенцијално смртоносни казни за употреба, во некои делови на северот и југот на земјата постои одредена канабис култура.

Канабисот што се одгледува во северните територии се смета за со понизок квалитет од оној во јужните, потопли области. Провинцијата Јунан, особено градот Дали, е еден од центрите на канабис културата во земјата поради диворастечката марихуана во регионот. Јунан во 1998 г. започна кампања за искоренување на дивиот и комерцијалниот канабис, но и покрај нивните напори, одгледувањето и натаму продолжува.

2. Дали CBD е легален во Кина?

Благодарение на големото одгледување коноп, Кина има просперитетна CBD индустрија и е меѓу водечките производители на CBD производи во светот. Но, жално, производите со CBD не се достапни за кинеските граѓани и се произведуваат исклучиво за извоз. Значи, иако Кина масовно произведува коноп, употребата, купувањето и продажбата на CBD во земјата остануваат нелегални.

3. Дали е легално да се праќаат семки од канабис во Кина?

Не. Семките од канабис исто така се сметаат за нелегални во Кина. Испраќањето семки ќе заврши неуспешно, бидејќи речиси сигурно ќе бидат конфискувани на царина. 

Иако можно е да налетате на некоја продавница која продава семки од марихуана во одредени градови, кинескиот закон наложува дека и продажбата на семки е забранета.

4. Медицински канабис во Кина

И покрај тоа што канабисот е нелегален, Кина е еден од најголемите производители на медицински канабис. Според Светската организација за интелектуална сопственост, државата поседува преку 50% од актуелните 606 патенти поврзани со канабисот. Позиционирањето како лидер најверојатно ќе и овозможи на Кина да заработи од извозот на медицински производи во земји каде што медицинскиот канабис е легален и баран. Медицинската вредност на канабисот одамна е опишана во древната кинеска литература, особено поврзано со семките од канабис, но легалниот медицински канабис сѐ уште е само далечна надеж за кинеските граѓани.

Земјата останува упорно против легализирање на растението, и покрај тоа што кинескиот канабис се користи како природен лек со повеќе од 2000-годишна традиција. Иако Кина може да доминира на пазарот за медицински канабис, нема планови за легализација и медицинска употреба на растението. Сепак, економската добивка би можела да ја натера да усвои понови, попрогресивни политики во иднина.

5. Индустриски коноп во Кина

Како што претходно беше спомнато, Кина располага со огромна индустрија за индустриски коноп, и во моментов е најголемиот производител на коноп и производи од коноп во светот. Кратко време беше забрането одгледувањето на коноп, но од 2010 година, државата повторно започна со извоз на коноп и производи насекаде по светот, со сè поголема побарувачка од Северна Америка и Европа.

Ова се должи пред сѐ на значајниот пораст на употребата на CBD производи во последната деценија. Денес има неколку плантажи кои главно се наоѓаат во провинциите Јунан и Шандонг. Иако Владата не објавува официјални податоци за одгледување и производство, истражување од 2018 година покажува дека Кина произведува повеќе од половина од вкупната глобална понуда на коноп. Продажбата на кинески конопни влакна се проценува дека изнесувала неверојатни 1,2 милијарди долари во 2018 година.

Истото истражување покажува дека Кина учествува со 11% од глобалниот CBD пазар, кој достигнува милијарди во Европа и САД. Со натамошниот развој на пазарот за медицински канабис, се повеќе се бара Владата да ја прошири веќе огромната индустрија за коноп. 

Со зголемувањето на побарувачката за коноп, постои очекување дека растот на одгледувањето може радикално да го промени селското стопанство во Кина, а кампаниите истакнуваат дека ова ќе отвори можности за повисоки приходи и посигурна работа за работниците. Водени од потенцијалните економски придобивки, кинеските власти најавија отворање на нови плантажи во провинциите Гансу, Хејлунгџијанг, Анхуи, Внатрешна Монголија и Ксинџијанг.

6. Историја и политика

Многу од соседните држави на Кина одгледуваат канабис и коноп со векови, а најстарите археолошки докази за користење на конопот датираат илјадници години наназад. Конопот се користел за изработка на облека и јажиња, а ткаенина од коноп стара над три илјади години од времето на династијата Чоу (1122-249 п.н.е.) е пронајдена во кинески гробници. И покрај археолошките докази, и старите записи го споменуваат конопот како извор за облека. На пример, „Шу Кинг“, книга од 2350 п.н.е., ја опишува почвата во Шантунг како „богата со свила и коноп“, а и античките песни спомнуваат ткаење на коноп во облека.

Поради јачината и издржливоста, Кинезите го користеле конопот и за воена опрема, додека постои тврдење дека и првиот рачно изработен плат, хартија од растителни влакна, потекнува токму од Кина. Овој разновиден и одржлив материјал бил искористен и од кинеските стрелци за правење тетиви за лак. Со овие силни тетиви, стрелите оделе понатаму од оние изработени од бамбус, што во праисториските војни било исклучително важно.

Поради важноста на конопот, кинеските владетели доделувале значителни површини за одгледување на растението. Покрај тоа што е извонредно корисен, кинескиот канабис бил вреднуван и како медицинско средство пред модерната фармација од 20 век. Кина очекувано има долг однос со ова растение, кој трае илјадници години. Но, основањето на Народна Република Кина во 1949 година со себе донесе и целосно негирање и стигматизација за употребата на растението. Парадоксално, и покрај тоа што Кина денес е најголем извозник на коноп и има толку богата историја, нејзин граѓанин и денес може да биде егзекутиран поради употреба на канабис.

Политика

Како што веќе дискутиравме, Кина останува цврсто против употребата на канабис и рекреативно и како медициснко средство. Според тамошните ставови, марихуаната е потенцијално штетна супстанца и не треба да се консумира, дури ни во медицински цели, па изгледите за легализација се многу мали. Сепак, во некои делови од државата, особено во поголемите, повеќе западни градови, употребата на канабис е доста честа кај популацијата до 35 години, и покрај ригорозните казни. Дури и во руралните области, одделни заедници ги ценат терапевтските можности на растението кои се познати со милениуми. Со растот на индустријата за коноп, некои експерти сметаат дека кинеската политика кон медицинскиот канабис би можела да се промени – но моменталната состојба не го најавува тоа.

7. Добро е да се знае

За сите што планираат да патуваат во Кина, наш совет е да внимавате, дури и во предградијата каде што канабисот се консумира послободно. Во последно време употребата на канабис во Кина е во пораст, а полека се менуваат и ставовите за растението. Од табу тема, марихуаната стана подостапна и помалку осудувана, барем во одредени средини. 

Иако марихуаната е лесно достапна, квалитетот често е низок и земајќи ги во предвид можните последици, нашиот совет е да прескокнете со џоинтот при посета на Кина. Додека употребата и понатаму е нелегална, со потенцијално ригорозни казни за поседување или продажба, канабисот, посебно за рекреативни корисници, не е добра идеја во Народна Република Кина.