Помалку алкохол, повеќе трева: Како Ковид-19 го смени забавувањето на кампусите?

Истражувањето „Monitoring the Future“ од 2020 година откри дека речиси половина од младите на возраст 18–22 години што студираат на колеџ, користеле канабис во изминатите 12 месеци. Историски рекорди постигна и секојдневната или речиси секојдневната употреба. Во исто време, однесувањата поврзани со пиење алкохол, како опивање и претерано пиење, значително се намалија.

Истражувањето беше спроведено од мај до ноември 2020 година, кога САД првпат се соочи со сериозни последици од пандемијата, а научниците веруваат дека оваа промена во трендовите на употреба на психоактивни супстанции делумно се должи на ограничувањата поврзани со Ковид-19.

Спорен начин на справување со стрес

Една од причините поради кои канабисот стана популарен меѓу студентите во 2020 година може да биде неговата способност да овозможи привремено бегство за оние кои живееја во постојана изолација и досада. Како што се намалуваше бројот на забави на кампусите, повеќе луѓе се свртеа кон канабис.

Употребата во текот на изминатата година достигна 44 проценти во 2020, што е пораст од 6 поени во однос на 2015 година. Исто така, речиси 3 поени порасна секојдневната или речиси секојдневната употреба во истиот период — од 5 на 8 проценти.

Треба да се напомени дека нагорниот тренд беше забележан и пред пандемијата, па врската не е целосно јасна. Во исто време, пиењето алкохол на кампусите драстично опадна — од 62% во 2019 на 56% во 2020 година. Ова јасно е последица на помал број на социјални настани за време на здравствената криза.

Трендовите во употреба на супстанции доаѓаат и заминуваат. Но, не секогаш

Професорот Џон Шуленберг од Универзитетот во Мичиген, еден од главните истражувачи, вели дека психоактивните супстанции понекогаш ја губат популарноста со текот на годините, но можат и да се вратат. Тоа се случи со никотинското вапирање, чие нагло зголемување предизвика загриженост кај здравствените професионалци пред само две години. Последното MTF истражување покажа дека тој тренд веќе е во опаѓање.

Сегашната популарност на канабисот меѓу студентите може да се покаже како долгорочен тренд. Истото истражување забележа рекорден пад во перцепцијата на ризикот кој младите возрасни го поврзуваат со употребата на оваа супстанција. Само 24 проценти од нив сметаат дека таа претставува значителен ризик за здравјето. Ова е најниската точка досега, а оваа бројка зборува за нешто што ја надминува само перцепцијата на студентите – таа го одразува целото општество.