Тајланд ќе дозволи одгледување канабис во домаќинства

Во вторникот, одборот за наркотици на Тајланд ја објави одлуката да го отстрани растението канабис и сите негови делови од листата на забранети дроги. Овој потег ќе ја направи земјата прва во Југоисточна Азија што ќе им дозволи на жителите легално да го одгледуваат овој културен вид. Во 2018, Тајланд беше првиот во регионот што ги призна терапевтските придобивки на растението, легализирајќи ја неговата медицинска употреба.

За легално одгледување канабис, сопственикот на домаќинството треба да ги извести локалните власти и да биде подготвен за случајни проверки. А за продажба на приносот ќе биде потребна и посебна лиценца, бидејќи според сега важечкиот закон дозволено е само лично користење на канабис како традиционална медицина.

Кулминација на постепената легализација на марихуаната

Министерството за здравство на Тајланд се очекува оваа недела да претстави посебен закон кој ќе содржи насоки за консумирање производи од канабис, вклучувајќи ја и рекреативната употреба. Нацрт-законот исто така ќе ги опфати прашањата за продажба и дистрибуција.

Во меѓувреме, моменталниот закон ќе биде објавен во Кралскиот весник, што ќе означи почеток на 120-дневниот период на чекање. Потоа, домашното одгледување на канабис ќе биде легално во Тајланд.

Земјата одамна се подготвуваше за идејата за легализација на канабисот. Од минатиот декември, е легално да се одгледуваат, поседуваат и продаваат делови од растението што содржат малку канабиноиди. Тоа се корените, стеблата, гранките и листовите. По таа одлука следеше и следната – да се дозволи одгледување и на цветови.

Од пица-додатоци до истражувачки центри

Како и секој друг земјоделски производ, канабисот може да значи многу за земја во која една третина од работната сила работи во агро-секторот. Воедно, од легализацијата на медицинскиот канабис има бум во козметичката и прехранбената индустрија, овозможувајќи додавање на CBD и другите состојки на растението во голем број производи.

Еден од најголемите ланци за брза храна во земјата неодамна претстави пица со вкус на канабис која како додаток има и свежи листови од канабис. Оваа новина веројатно нема да остане долго во понудата и може да исчезне уште пред да се потрошат листовите, но покажува дека интересот на Тајланд за ова растение расте.

Друг доказ дека земјата сериозно го сфаќа овој „канабис-бизнис“ е и отворањето на истражувачки центар за медицински канабис. Центарот веќе привлече внимание од истражувачи од Канада, Холандија и Јапонија. Ова е доказ дека меѓународните чинители го сметаат Тајланд за најважен идниен центар на пазарот на канабис во Југоисточна Азија.