Uber Eats сега ќе има канабис во менито, но само во Онтарио, Канада

Помина доста време откако Uber почна да размислува за влез во растечката легална индустрија за канабис, а сега е направен првиот чекор. Наскоро, полнолетните жители на Онтарио ќе може да нарачаат марихуана преку Uber Eats апликацијата и да ја подигнат во најблиската продавница на Tokyo Smoke.

Во моментов, портпаролите на Uber велат дека немаат конкретни планови за проширување на услугата во други канадски провинции или американски држави. Но, ветуваат дека внимателно ќе ги следат новите регулативи и можности на пазарот. За Канада—каде што рекреативниот канабис беше легализиран во 2018 година—оваа новост претставува уште еден начин за борба против црниот пазар што сè уште контролира значителен дел од продажбата на немедицински канабис.

Правилата за алкохол и канабис засега се различни

Uber Eats веќе има искуство со испорака на уште еден опојен производ — алкохол. Жителите на одбрани канадски градови може да нарачаат пијалаци онлајн и да ги добијат на домашна или деловна адреса. Она што не можат, е да ги подигнат нарачките на улица или на места каде што е забранета потрошувачка на алкохолни пијалаци.

Правилата за марихуана се уште построги. Единственото место каде клиентите може да ги подигнат своите онлајн нарачки е најблиската продавница Tokyo Smoke. Tokyo Smoke е првиот продавец на канабис досега кој склучил партнерство со Uber Eats. Овој синџир продавници што работи во повеќе канадски провинции има и своја онлајн услуга за нарачки со опција за преземање надвор од продавница.

Потенцијалот е огромен

Акциите на Uber, кои последниот месец имаа слаби резултати, не се зголемија по оваа вест. И индекс-фондот што го следи пазарот на канабис, MJ, исто така не беше инспириран, продолжувајќи го надолниот тренд во понеделникот.

Сепак, навлегувањето на Uber во нова легална индустрија е ветувачки потег. Во 2021 година, вкупниот капацитет на пазарот на канабис во земјата изнесуваше 4 милијарди американски долари. Се проценува дека ќе порасне за повеќе од 50% до 2026 година, особено ако засегнатите страни најдат модел што ќе нанесе удар по црниот пазар. Тој сè уште е активен и сочинува 40% од целата рекреативна продажба во Канада.

Се надеваме дека големите играчи како Uber ќе помогнат Канаѓаните да одлучат дека е време да изберат побезбеден, почист и поквалитетен легален производ.