Генетското секвенционирање покажува дека канабисот бил доместикиран пред 12 милениуми

Многу луѓе не сфаќаат дека моменталниот интерес за канабисот не е само модерен тренд, туку дека оваа билка и’ служи на човештвото за различни потреби илјадници години.

Новата студија открила генетски докази дека канабисот бил доместикиран уште пред 12.000 години. Предокот на сите оние култивари што денес растат под вештачки светла, на полиња или диво, бил сорта на коноп од северозападна Кина.

Луѓето рано ги препознале големите придобивки од оваа билка и ја култивирале со милениуми, што ја прави една од првите доместикирани култури. Археолозите ја потврдуваат истата приказна, бидејќи траги од коноп, како ознаки од јаже на садови, се пронајдени на многу археолошки локалитети ширум светот.

Заеднички предок на целата модерна марихуана е сега изумрен

Научник од Швајцарија, Лука Фумиџили, заедно со колеги од други земји започнале амбициозен проект за секвенционирање на геномите на 80 сорти канабис и коноп од целиот свет. На тоа додале уште 30 геноми што претходно биле секвенционирани.

Доказите од анализите покажуваат дека предокот на сите модерни култивари растел диво во северозападниот агол на Кина. Овој вид сега е изумрен, но неговите блиски роднини сè уште виреат во истиот регион.

Селективното одгледување започнало пред само 4.000 години

И тогаш како и денес, луѓето го користеле канабисот за најразлични цели — како извор на влакна, како лек, го користеле маслото од семе за храна, па дури и ги користеле психоактивните својства во верски ритуали.

Но, генетски докази покажуваат дека не се обиделе да изберат култивари што ќе одговараат на сите тие потреби сè до пред околу 4.000 години. Потоа започнале да го селектираат, што довело до појава на две различни модерни подвидови. Едниот има долги стебла и многу влакна, другиот има покусо стебло, повеќе странични гранки и смолкави цветови.

И, се разбира, изминативе неколку децении има вистинска експлозија на селективно одгледување кога гените се манипулираат за да се постигне највисоко можно ниво на THC и — во поново време — и на терпени, ароматичните супстанции во марихуаната.